أقولك على سر ؟

عارف نفسى فى إيه يا عُمر ؟
نفسى يبقى عندى فلوس كتير ، مش علشان أنا طماعة ، لكن علشان أخلى أهلى يعيشوا كويس ، وأخواتى يتعلموا كويس ، وأمى تبطل تبكى ، نفسى بجد أمى تبطل تبكى ..
ونفسى أشوف أبويا بيضحك منغير نظرة وجع فى عينيه ؛ تفتكر الأحلام دى مستحيلة ؟

آه مستحيلة ..

بجد ؟

آه .. تحبى أقولك إنها ممكنة ؟

لأ متكدبش عليا ..

اسمعينى .. مشكلتك مش شخصية ، إنتى عايشة حالة الوطن ، مافيش أم مصرية مش بتبكى ، مافيش أب مصرى عينيه خالية من نظرة الوجع .. قولى يارب ..

___

ليه مقدمتش المشروع بتاعك لمسابقة أبحاث مكتبة الأسرة اللى تبع المحافظة ، فكرتك جامدة وأكيد كانت هتاخد مركز كبير أو ممكن تتأهل جمهورية ..

ومين قالك إنى مقدمتش ؟

طيب أومال ايه ؟

أبداً يا سيدى ، أخدت المركز التانى ورفضوا يأهلونى للمرحلة النهائية فى القاهرة ، ولما سألت قالولى بالنص "منقدرش نطلع الأول على أسيوط واحد نصرانى" ..

إيه ؟!

شيبسى وكاراتيه ؛ زى ما باقولك كده ، كنت فى تانية اعدادى ومقدرتش أستوعب اللى بيقولوه ، بس فاكر إنى قعدت أعيط ورحت لأبويا وحكيتله اللى حصل ؛ قاللى بس مش عايزين مشاكل أحسن يطلعونا من البلد ..

إيه ؟!

مندهش ليه ؟

أنت عارف المسيحيين بيتعاملوا ازاى فى البلد دى ولا انت من كاليفورنيا ؟

عارف يا عم بس مكنتش فاكر للدرجادى ..

يبقى أديك عرفت إنها للدرجادى ، من ساعتها وأنا ممسكتش مفك فى إيدى وكرهت الهندسة والكهربا والإختراعات وكل حاجة ، ولو شفت حد بيعمل حاجة تفيد البلد دى بابقى عايز أقوله إنفد بجلدك ، موهبتى ضاعت علشان أنا "نصرانى" .. 

فاهم ولا هتقوللى "إيه" ؟!

___

تفتكر الواحدة ممكن تجيب أطفال من واحد هى مش حاسه معاه بالأمان ؟

أنا شخصياً باحب البطاطس ..

بطل هزار يا عُمر ..

حاضر ، أنتى نفسك فى أطفال ؟

أوى أوى أوى ، بس مش عايزة !

البطيخة ..

بس بقى باتكلم جد ..

إزاى نفسك فى أطفال أوى ومش عايزة ؟

مش عايزه أطفال يكون هو أبوهم ، أنا مختارتش الشخص ده علشان يكون جوزى ، ومش هاختاره يكون أبو أطفالى ، عايزه ابنى أو بنتى يكونوا فى أسرة صح ، أسرة بتحب بعضها ، أنا مش باحبه وهو مش بيحب غير جسمى ، أنا اخترت "ضِل راجل" وهو اختار "جسم بنت" ، مش عايزة ولادى يكونوا ناتجين من زواج ضِل راجل وجسم بنت ..

___

عارف صاحبتى اللى حضرت فرحها من شهرين ؟

آه ؛ مالها ؟

ولادها دخلوا المدرسة ؟

لأ .. اتطلقت ..

إيه ؟ .. بجد ؟ .. هى لحقت !!

جوزها بيضربها وبيهينها وبيشتمها بأهلها ..

وأخو جوزها بيشتمها وبيعاملها وِحِش ..

وحماتها بتشتمها ومطينة عيشتها ..

طيب ليه أبوها مش بيتدخل ويحميها ؟

أبوها راجل طيب ومالوش فى حاجة ، غلبان .. بص من الآخر هو راجل عبيط ومش قادر يجيب حق بنته ..

طيب مالهاش أخوات ولاد ؟

أخوها أكبر منها بأربع سنين مطلعها هى غلطانة وقاللها "مش عايز أختى تبقى متطلقة" ..

فيه كده ؟!!

وأكتر .. جوزها هيرجعها ورجلها فوق رقبتها منغير أى شروط ، يعنى هترجع تتبهدل أكتر منغير ما تقدر تفتح بقها !

ياااااه !! ..

عارف إنها مش بتطيق تسمع صوته ، ولا بتطيق تنام معاه ، وليلة الفَرَح كان يوم أسود عليها علشان بيتعامل على السرير زى الحيوان ، هى أصلاً مش بتقول عليه غير الحيوان ، لكن قدامه مش بتقدر تفتح بقها ، علشان متبقاش "مُطلقة" ، وانت عارف الناس بتبص ازاى للمطلقة ، يعنى مستحملة تعيش مع واحد زى ده بتكرهه وبتكره أهله وبتنام معاه على نفس السرير بس علشان متبقاش مُطلقة ..

عُمر .. أقولك على سر ؟ .. "إحنا فى مجتمع مريض" .. بس متقولش لحد ..